EsP II Yunit I Aralin 4

      Ang sumusunod na artikulo ay hango sa 2010 Secondary Education Curriculum -UBD, EP  II ph 48-51.
Ang Pamilya sa Pamayanan
                        Natural sa Pilipino ang pagiging makapamilya. Natural na tulungan ang mga kamag-anak, lalo na ang mga kapus-palad. Sana, ang pagmamalasakit sa kamag-anak ay maitawid hanggang sa kapitbahay at sa pamayanan.
                         Ang lakas ng bawat pamayanan ay makikita sa pagkakasundo ng bawat pamilya. Walang pamayanan ang magiging maunlad kung walang pagkakaisa ang bawat pamilya.

                           May mga pamilyang pinipiling magdaos ng kaarawan ang isa sa miyembro ng pamilya sa bahay ampunan o magbigay ng donasyon sa isang institusyon. Sa halip na bumili ng mamahaling damit at magkaroon ng malaking selebrasyon, pinipili nilang ipagluto, pakainin at bigyan ng regalo ang mga batang ulila sa bahay ampunan. Nagiging masaya ang mga bata sa ampunan kapag nakakasama nila ay ang isang buong pamilya. Bagama’t malungkot para sa kanila dahil wala silang mga magulang, nagkakaroon naman sila ng ideya kung paano magkaroon ng isang buong pamilya. Magiging inspirasyon ito sa kanila.

                             Maraming pagkakataong nasubok ang pagtutulungan ng mga Pilipino. Sa bawat kalamidad at sakunang nagaganap sa ating bansa, mga kapwa Piipino ang nagtutulungan upang mailigtas; mabigyan ng lunas; mabigyan ng pagkain at damit; at mabigyan ng bagong tahanan.

                            Bakit kailangang tumulong ng pamilya sa pamayanan? Ayon sa isang babasahin, may tatlong dahilan kunga bakit dapat tumulong ang pamilya sa pamayanan.

1. Mabuti ang pakiramdam ng tumutulong. Ang pakiramdam na nakatulong ka sa iba ay may dulot na kaligayahan.

2. Napatatatag ang pamayanan. Kung ang mga samahan at ahesya ay may mga boluntaryong naglilingkod sa pamayanan, nagkakaroon ng pagkakataong umunlad ang pamayanan.

3. Napatatatag ang pamilya. Nagiging higit na malapit ang pamilya sa tuwing sila ay tumutulong sa pamayanan. Ang libreng oras ng pamilya ay nagugugol sa pagsama sa mga boluntaryong gawain para sa pamayanan.

                          Maging inspirasyon sa iba, lalo na sa kapareho mong kabataan. Sa halip na gugulin ang libreng oras, yayain ang iyong kapamilya na tumulong sa pamayanan. Kahit na munting donasyon sa inyong barangay o simbahan, makakatulong ito ng malaki sa mga nangangailangan.

 Maikling Pagsusulit

1. Patunayan na ang pamilya ay nakakatulong sa pagtataguyod ng mabubuting proyekto ng  pamayanan 

2. Patunayan ang kahalagahan ng  pagiging bukas ng pamilya sa pagtulong sa kapwa.

3. Tukuyin ang mga pagpapahalagang natutuhan sa pagtulong ng pamilya sa pamayanan?

4. Tukuyin ang mga paraan upang makatulong ang pamilya sa pamayanan?

5. Ibahagi ang sariling pananaw tungkol sa mga magulang na ginagamit ng ilang pamilya ang  kanilang impluwensya upang magkunwaring tumutulong sa kapwa kapalit ng pansariling kapakanan.

6. Ipahayag ang paghanga sa mga pamilyang handang tumulong sa pamayanan.

7. Tukuyin ang reyalisasyon o napagtantong katotohanan tungkol sa kahalagahan ng pagtulong ng  pamilya sa pamayanan